Os días 4 e 5 de novembro celebrarase, no Pavillón Municipal de Deportes de Pontevedra, o XXV Campionato Internacional de Taekwondo Cidade de Pontevedra, que este ano celebra ás súas bodas de prata e contará con case 2.000 participantes entre deportistas, técnicos e árbitros, de Galicia, o resto de España e outros países coma Portugal, Perú, Guinea, Arxelia ou Bélxica.
En total son 1.381 deportistas de 102 clubs, 200 adestradores e máis de 60 xuíces, sen contar á organización e voluntarios, os que desenvolverán o seu papel nas 13 pistas dispostas no Pavillón. O presidente do Mace Sport, Miguel Cortegoso, explicou que a principal dificultade desta edición foi que “o campionato medrou pero as datas minguaron”, xa que nesta edición non puideron coller o festivo do 1 de novembro, “así o pasado ano tivemos 4 días de competición e este ano son só 2 días”.
O campionato comezará este sábado, ás 09.00 horas, coas categorías júnior e infantil en combate xunto á modalidade de técnica. Pola tarde (16:00 horas) será a quenda das categorías absoluta, máster e precadete.
O domingo, a actividade comezará ás 09.00 horas, coa competición cadete de combate e o resto das categorías de técnica, para rematar, a partir das 15:00 horas, co freestyle.
