GALICIA TEN A 30 DEPORTISTAS NO MUNDIAL DE TÉCNICA E FREESTYLE DE HONG KONG

Galicia contará con 30 deportistas no Mundial de Técnica e Freestyle que se celebrará do 30 de novembro ao 4 de decembro en Hong Kong (China). Como é habitual,  as e os nosos deportistas lograron a clasificación ao longo da tempada nas diferentes probas clasificatorias, nas que sempre renderon a un gran nivel e proba diso é que temos en Hong Kong a 30 deportistas e dous técnicos para competir no Mundial. A nota negativa foi a baixa por lesión de Antón Sabín que foi substituído por Hugo Arnoso.

A expedición galega partiu o martes en dirección á sede do Mundial nunha longuísima viaxe de case 24 horas de duración. Agora, aclimatación, algo de turismo, adestramentos e a prepararse para a gran cita que comezará para o noso equipo o sábado 30 coa celebración da proba do quintetos + 18 anos en freestyle na que competirán Alejandro Losada García, Bárbara di Martino, Iago Gil, Manu Paz e Iria Rodríguez.