Mañá 28 de maio celebrarase no Pavillón Municipal de Vilalba a I Xornada de Taekwondo Inclusivo, na que participarán deportistas, árbitros e técnicos que informarán sobre o parataekwondo e as súas posibilidades.

 

A Federación Galega de Taekwondo está a traballar na posta en marcha dun departamento de parataekwondo, co obxectivo de ir incorporando ao noso deporte a máis deportistas con algún tipo de discapacidade.

 

A xornada comezará ás 10:30 horas cunha charla a cargo de Manuel Barros (clasificador internacional de parataekwondo) na que se fará unha introdución ao ParaTKD, e na que tamén contaremos coa participación de Alex Vidal (cinco veces campión do mundo de parataekwondo e deportista paralímpico) e varios membros da selección galega de ParaTKD de poomsae. Ás 11:30 celebrarase un adestramento de técnica (a cargo de Antonio Montes) e finalizaremos cun adestramento de combate (12:15), impartido por Alex Vidal.

 

Esta xornada, totalmente gratuíta, vai dirixida a todos os sectores do taekwondo (adestradores, deportistas, árbitros, dirixente), xa que pretende dar unha pequena introdución sobre o ParaTKD e ofrecer a persoas con discapacidade esta disciplina deportiva, que sen dúbida algunha lles pode aportar moito tanto a nivel físico como mental.

 

 

Print Friendly, PDF & Email