Os xuíces galegos María Bautista e Adrián Maceiras están a participar no proceso de selección arbitral para os Xogos Olímpicos de Los Ángeles 2028, que arrincou esta semana no Campamento Internacional de Árbitros de World Taekwondo de La Nucía (Alacante). Máis de 100 árbitros/as de todo o mundo inscribíronse nesta concentración, co obxectivo de traballar e competir pola súa presenza no ciclo selectivo olímpico.
Este é o primeiro paso e aínda queda moito traballo por diante. Nos vindeiros meses celebraranse varios eventos máis coma este no mundo e de todos eles sairá unha selección de trescentos xuíces que dirixirán os eventos oficiais da Federación Mundial de Taekwondo e entrarán no esixente proceso de selección que culminará coa designación do equipo arbitral olímpico de LA 2028.
